Սևան քաղաքի Ցամաքաբերդ կոչվող թաղամասի մոտ ՝ 2,5֊3 կմ դեպի արևելք գտնվում է մի փոքրիկ մատուռ, որ տեղացիներն անվանում են ՝ «Մաշտոցներ» Մաշտոցներ են անվանում նաև մատուռից արևելք ընկած լեռները, որոնց հարավային լանջերից մեկի վրա էլ այն տեղակայված է։
Մաշտոցներ անվանումը կապված է Մաշտոց Ա. Եղիվարդեցի կաթողիկոսի հետ, ով եկել էր վերոնշյալ Սևանի կղզու հանդիպակաց լեռներում ճգնելու։ Ավանդույթն ասում է, որ մատուռի կողքով հոսող աղբյուրի ջուրն ունի բուժիչ հատկություն։ Մատուռից բացվում է տեսարան դեպի փոքր Սևանի կողմը, իսկ դիմացից երևում է Մաշտոցների լանջերին փռված խիտ անտառը։
