Օրեր առաջ ՆՓԱԿ-ում կայացած #BridgingStories կամ «Կամրջելով պատմություններ» ծրագրի մանակիցների լուսանկարչական աշխատանքների ցուցահանդեսն էր, որին մասնակցում էր նաև մեր ակումբի ակտիվ կամավոր Սասուն Մինասյանը:
Քանի որ Սասունի շնորհիվ ծրագրի ընթացքում բազմաթիվ անգամներ մեր քաղաքը լուսաբանվեց տարբեր հարթակներում և վերջիվերջո Սասունը դարձավ ծրագրի հաղթողներից մեկը , խնդրենք նրան պատմել այս ամենի մասին :
-Իրոք մեծ պատիվ էր լինել մասնակիցը այս հրաշալի և նմանը չունեցող ծրագրի, քանի որ այն ընդլայնեց մեր հնարավորությունները և կարողությունները ֆոտոլրագրության ոլորտում, ծանոթացրեց դրա հիմունքներին, և մեզ հնարավորություն ընձեռվեց կերտել գեղեցիկ ֆոտոպատմություններ՝ դրանք հանրությանը ներկայացնելով։
Ծրագիրը սկսվեց ճամբարով անցած տարի օգոստոսին։
Այնուհետև սկսվեց լուսանկարելու շրջանը։ Հայ և թուրք երիտասարդ լուսանկարիչներս լուսանկարում էինք մեզ շրջապատող աշխարհը՝ ծննդավայրը, քաղաքներն ու գյուղերը՝ փորձելով ցույց տալ մեր երկու ժողովուրդների թե՛ նմանությունները և թե՛ տարբերությունները, ընդ որում՝ այն, ինչ միավորում է մեզ, շատ ավելին է, քան այն, ինչը բաժանում է։
Եվ քանի որ ես Սևանի բնակիչ եմ և նրա մի մասնիկը, լուսանկարներիս մեծ մասը արել եմ այստեղ։
Ֆոտոպատմությունների մի շարք արվել են նաև հարակից գյուղերում՝ Վարսերում, Ծաղկունքում և, հատկապես, Դդմաշենում։
Ծրագրի շրջանակներում արված բոլոր լուսանկարները ստեղծվել են միանման սմարթֆոնների միջոցով, որի նպատակն էր լուսանկարները մշակել տեղում և հրապարակել այն ինստագրամյան #BridgingStories (@bridging.stories) էջում՝ ներկայացնելով լուսանկարին համապատասխանող պատմությունը։
Ծրագրի ամբողջ ընթացքում մեզ մոտիվացնում և ուղղորդում էր համաշխարհային National Geographic ամսագրի ֆոտոլրագրող Ջոն Սթենմայերը։ Նա ընդհանուր առմամբ ծրագրի մեծ ներդրողն էր։
Ջոն Սթենմայերը, Անուշ Բաբաջանյանը և Սերա Աքջանը ուղղորդում էին նաև լուսանկարները ընտրելու և մշակելու հարցում։
Ի դեպ ցուցահանդեսը բաց կլինի ՆՓԱԿ-ում մինչև փետրվարի 7 ը :
